እቲ ክጅምሮ ከሎ ከምኡ ዝመስሎ ዘይነበረ ዝሓለፈ ናይ ፍቅሪ ተመኩሮኡ፡ ኣብ ህይወቱ ክምልሶም ዘለዎ ሕቶታት ኣለዒሉ'ዩ ራሕሪሕዎ። ደጊሙ ፍቅሪ ክጅምር እንተኮይኑ ብ'ዝቀደመ ኣይኽፋእ ተሰሪሑ ዝፍንጣሕ ዘይኮነ፡ ናይ ግድን ሓቀኛ ዘልኣለማዊ ፍቅሪ ክኾነሉ'ዩ ትምኒቱ። ምስ ሳሮን ትምኢልካ 'እንተቀዶ ቀዶ እንተዘይቀዶ ሕንጣጦ' ዓይነት ኣካይዳ ክኸይድ ድላዩ ኣይነበረ፡፡ ኣብ መፈጸምትኡ ዘይበጽሕ ኣቋሲልካ ዝግደፍ ፍቅሪ ምርጭኡ ኣይኮነን። ቃንዛ ምፍልላይ ክምለሶ ፈጺሙ ኣደልዮን፡፡ ጀሚርካ ዝቋረጽ፡ ኣደዳ ዝኽርን ትኻዘን ጌሩ ሰላምካ ዝዘርግ ፍቅሪ ክጅምሮ'ውን ኣይደልይን'ዩ፡፡ ሓንሳብን ንሓዋሩን ጥራይ! ህሉውን ዝኾነ ቅድመ-ኩነት ዝየቀምጥን እንተ ኮይኑ፡ ባህጉ ንሱ'ዩ፡፡